Rev 15 | NAS | STEP | Teketa napoꞌ kapooꞌ pankaing taaꞌniꞌanta paning-koo ooantuꞌ ~kenaanka-taa koosinunankai teeꞌning nariꞌ napoꞌ ~kenaanka-taa arikananka kompaioꞌ. Teing eeꞌning asiꞌning eeꞌnoko teing arikananka ninka Kumponing bakaang iira nariꞌ bakearavaing.

Revelation of John 15

~Kenaanka-taa Koosinunanka Arikung Tavoꞌantananka Daaꞌariruꞌnaꞌ

1 Teketa napoꞌ kapooꞌ pankaing taaꞌniꞌanta paning-koo ooantuꞌ ~kenaanka-taa koosinunankai teeꞌning nariꞌ napoꞌ ~kenaanka-taa arikananka kompaioꞌ. Teing eeꞌning asiꞌning eeꞌnoko teing arikananka ninka Kumponing bakaang iira nariꞌ bakearavaing. 2 Napoꞌ tanoonooꞌ naankuviraaꞌnooꞌ ooantuꞌ pirung-pinaꞌ neenkirooꞌnooꞌ, ntaꞌ kuunge aramoꞌarakooꞌ aaꞌnooꞌ. Eeꞌnoko teka eeꞌnooꞌka nantoong donkonai otoroko ooarantuꞌ, aing aaꞌning puruꞌauꞌning: biikonavoroꞌ, tee baka-oo, bakaang mooꞌdoꞌanta eeꞌnoko bakaang miring-koo deerunooꞌ; kiitananka ninka Kumponing daangang-koonanka ninka otoroko. 3 Kena-koo Moosesi, tee Kumponing-nung botovotonaaꞌ, eeꞌnoko tee Kampia beekaning kenavaakoꞌ, eeꞌ kena:

“Dakaang nko-nko tee pankaing taꞌnimpaariiꞌ. Daꞌ tee bakei dau basinaꞌ aaꞌnaꞌ purintoꞌpoꞌnung Ovoring Kumponing, Ookara-koo nkovemaing-koo tee masikaꞌ koontoꞌnaꞌ oroꞌdaramaung. Daꞌ avatevarang-koong daurarong~. 4 Naning baa masikung daꞌkoo amaiaaꞌoarupeuꞌ ee Ovoring? Eeꞌnoko baie daꞌkoo meenasi beꞌantavuarupeuꞌ miring pankaing-antaruma? Naning otoaꞌ, aiꞌ meekung tee daꞌ narung. Ookarai nantoonge amutemuuꞌke tee poroma daꞌ narung dootuuꞌdaavaing, tee dakaang nko-nko koontoꞌ ookarai siraꞌparioꞌ ooaara.”

5 Aung-koo damaꞌke napoꞌ paning-koo dootuuꞌnava-koo kuunga tevaro meekavaro daateꞌarioꞌ ooantuꞌ, tevaro Kumponing bakaang kara kapang-koo mooꞌdoꞌniiꞌ otoing-navaro. 6 Teketa dootuuꞌnava-ita ~kenaanka-taa koosinunanka siariko ooarantuꞌ teeꞌning arikananka napoꞌ kompai. Mononopaꞌ aaꞌnaꞌ kiiroraaꞌ, pipiraarie nopaꞌniiꞌnuka eeꞌnoko murukeue kapeto tokoniiꞌ kooro-koo nkoniiꞌke keemouniiꞌnuka. 7 Eeꞌnoko teketa teing-koo domantoia karenaumo kupaꞌpoꞌning-koo narunge utaunankai kooro-koo nkoniiꞌke kantevuruꞌ ~kerenta-taae teing ~kenaanka-taa koosinung, teing utaunanka iirai maantoꞌnanka tee Kumponing Otoi-otoꞌ bakaange. 8 Eeꞌnoko tee dootuuꞌnava iie aaꞌnaꞌ maantoꞌuuꞌ Kumponing bakaang meenasi-eta eeꞌnoko napoꞌ bakaang iriꞌketa, naning tung-koo makotuaruuꞌ teva dootuuꞌnava-koo, bera teing ~kenaanka-taa arikananka teinge ~kenaanka-taa koosinunge tavoꞌaara bakeariainooꞌke basi.